貼地情侶「有錢一齊用」江若琳Oscar慳住放閃 $150蜜遊大埔

貼地情侶「有錢一齊用」
江若琳Oscar慳住放閃 $150蜜遊大埔

拍拖可以好豪,也可以好貼地。37歲「生煎包王」蕭潤邦(Oscar)和30歲未婚妻江若琳拍拖非常貼地,日前還蜜遊大埔放閃,既踩單車又划艇玩足半日,300元使不完,用剩一半,埋單不足150元,全靠準人妻江若琳醒目講價,Oscar大方表示將來婚後家用讓老婆管理,有錢一齊用。

常言道「簡單就最開心」,江若琳和蕭潤邦正是這類人。Oscar日前37歲生日,他貼相公佈求婚成功,其實自去年兩人相戀,拍拖期間甚少出入五星級大酒店或高級食肆,反而貼地捐窿捐罅尋找隱世美食。
Oscar孖江若琳每次拍拖都非常慳家,兩人日前穿上同款情侶裝殺入大埔,趁冬日陽光甜蜜郊遊,打算用300元玩轉大埔,同時玩齊踩單車、嘆豆腐花、划艇、掘蜆及欣賞日落,不過江若琳原來是講價高手,結果又玩又食,最後埋單花了不足150元,貼地有找。

「貼地情侶」江若琳與Oscar起初打算用300元玩轉大埔。

【$30租家庭單車】
江若琳與Oscar日前公佈婚訊,不怕肉麻的二人在大埔踩單車盡情放閃,更成功講價租車。攝影:林德雄

【$35租艇出海】
江若琳與Oscar合力划艇,可是兩人不協調,小艇不停轉圈。

【$13豆腐花】
士多老闆娘見江若琳租艇,即請她食豆腐花,Oscar再以13元買多一碗。

「低能」的浪漫

首站先去大美督租單車,江若琳講價後用30元平租一輛家庭單車,Oscar繼續做「御用柴可夫」出力踩車,心情大靚的他迎風一邊踩車,一邊哼歌:「面對當年情……」江若琳好奇發問:「呢首乜嘢歌?」Oscar答是劉德華主演電影《烈火戰車》的《情深的一句》,Oscar再唱:「真心說句……」江若琳毫不畀面揶揄男友清唱走音兼低能:「你估你真係華Dee咩?」Oscar懶理繼續自我陶醉,兩人享受「低能」的浪漫。
江若琳和Oscar途經大美督主壩,見到碼頭旁可以划艇,他們就棄車出海。江若琳租艇後,獲老闆娘免費請吃豆腐花,當然一碗兩份食,其後兩人再多買一碗。首次划艇的江若琳超級興奮,她雀躍高呼要划到海中心,Oscar神回:「要call定水警,划到出去我應冇晒氣。」兩人合力划,卻不協調,結果小艇不停打圈,雞手鴨腳的江若琳划艇時更不小心打到Oscar的大髀,令他慘叫,最後Oscar呻暈遂提早埋岸。

【$55買工具掘蜆】
配合日落靚景,Oscar和江若琳買工具掘蜆,準備做晚餐。

江若琳與Oscar在岸邊甜蜜攬攬,猶如影婚照一樣。

一班來大埔郊遊的學生見到江若琳和Oscar即要求集郵。

攬住睇日落

上山下海意猶未盡,江若琳和Oscar即興再去掘蜆,到附近士多買「架生」,趁黃昏潮退掘蜆,江若琳見到巨蜆又為食癮起:「我想一半用嚟燒,一半清酒煮。」掘蜆同時又欣賞到日落,Oscar情深擁着未婚妻享受良辰美景。

兩人半日玩勻三個景點,準蕭太江若琳埋單計數,原來僅用了143元:「三嚿水真係多咗,我哋平時起身食吓車仔麵、魚蛋粉,做吓運動,所以今日算係豪華團,又頴到免費豆腐花。」Oscar表示只有特別日子才到高級餐廳吃飯:「我睇佢每日鍾意玩邊種情調。」問Oscar是否擔心未來老婆亂使家用?他大方答:「冇所謂,有錢一齊用,佢有時都闊佬請我睇戲食飯,至緊要大家開心。」Oscar全程肉緊搣江若琳臉頰,她反寸:「大家明我點解要買咁多緊緻護膚品!」
採訪:陳杰

Oscar與江若琳及友人身在白川鄉慶祝生日。互聯網圖片