街工葵青區議員周偉雄日前就喺facebook上宣佈退黨，佢喺聲明中話，因為無暇兼顧街工所安排嘅其他工作，加上希望集中處理地區內長者支援、長期病患者照顧等工作，所以正式退出。
不過八方聽聞事件另有內情。有民主派中人爆料，話街工立法會議員梁耀忠兩個月前喺黨內會議諮詢會員，想由下屆立法會由超級區議會轉返新西直選，周偉雄因為不滿阿忠「永續參選」，唔畀新人上位而退黨。
2016年嘅立會選舉，阿忠由新西轉戰超級區議會，黃潤達接棒參選新界西，阿忠成功當選，但黃潤達就接棒失敗。有民主派中人同八方講，街工內嘅少壯派普遍認為黃潤達下屆可以成功接棒，點知阿忠又話要返新西直選，自然惹起反彈，仲搞到周偉雄決定退黨。該民主派中人又話，其實街工葵涌邨北議員梁錦威早排亦都靜悄悄退黨，所以街工只係剩番黃潤達、阿忠同梁志成3個區議員咋。