民主派初選喺嚟緊個周日舉行，八方前日話參加九西初選嘅「政壇李克勤」、民協馮檢基預備定旅遊巴拉票，但八方估唔到係，基哥極之揼本，出大巴嘅規模直逼建制派，真係估佢唔到。
八方老友畀咗張馮檢基嘅宣傳單張八方，驟眼睇冇乜特別吖，都係阿基一貫嘅chok樣，加多句標語話「最後一戰，守護未來的光」。不過睇真啲，原來單張上寫住有「免費來回穿梭巴士接送」，不但有兩條路線咁多，而且仲係40班次無間斷直達票站，斷估唔係為方便街坊去買餸，而係借用大巴載選民去初選票站投票，動員支持佢嘅所有票源！
雖然民主派初選唔係受法例規管嘅選舉，用大巴車選民冇話犯法唔犯法，但以往每次正式選舉，當建制派用呢招嘅時候，大家都會覺得好有問題，真係估唔到如今基哥都學埋建制派啲陋習。
其實除咗大巴，基哥仲積極打網戰，繼前日上載一段「政壇李克勤vs樂壇馮檢基」引爆大批網民派嬲潮，噚日基哥再po咗多段「堅持到底，絕不放棄」短片，片中仲搵嚟民協副主席、深水埗區議員何啟明撐場，不過反應好唔好就真係見仁見智嘞。