送雞迎犬，嚟緊狗年又點少得以狗為題嘅紀念品？香港郵政本月27日會發售「歲次戊戌（狗年）」郵品。主角賀歲生肖郵票一套4枚售$15.6，通過瓷器、玉器、陶器及貝殼工藝帶出靈犬賀歲；另有金銀郵票系列「十二生肖金銀郵票小型張－－金雞靈犬」，雞年郵票用銀箔燙印，狗年郵票就嵌22K鍍金金片，100蚊套仲送黃金成色證明書，極具收藏價值。
另一款狗年絲綢郵票小型張背景就係杏花彩釉瓷塑，寓意幸福美滿；仲有兩款心思心意郵票小版張及多款狗年產品同日推售。1月27日全線集郵局會延長營業至下晝5點，部份首日封及紀念封今日有得買。