工聯會榮譽會長陳婉嫻一向出名有話直說唔畀面，所以梁振英做特首年代，佢就公開轟過689誤導勞工界支持，又話係勞工問題上689做得仲差過煲呔，就連林鄭佢都冇面畀，去年特首跑馬仔時，一時暗批林鄭扮獨立，一時質疑佢嘅政治智慧，又嘲諷新政府係「冧班子」，句句入肉。之不過娥特似乎冇放喺心，繼續重用嫻姐，政府噚日宣佈由佢接替女拔校長、財經事務及庫務局局長劉怡翔妻子劉靳麗娟，出任婦女事務委員會主席，為期兩年。
接任婦委會主席
現年七十有一嘅嫻姐，近年火氣不減，就算冇做立會議員，都經常撰文發炮，早前就出山鬧爆市建局嘅觀塘重建貨不對辦，最近律政司長鄭若驊涉僭建醜聞，一樣照鬧，話佢犯低級錯誤，明知有錯，但錯而不改。今次東山復出，仲由委員升呢，坐正做婦委會主席，相信嫻姐一定滿肚大計，已經諗定計，點推動家庭友善僱用政策，消除性別歧視。
勞福局長羅致光就歡迎任命嫻姐為婦委會主席，讚佢做過多年立法會同區議員，喺公共事務方面擁有豐富經驗，深信喺嫻姐領導下，婦委會將繼續促進本港婦女權益。
除嫻姐外，政府亦委任4人出任婦委會委員，包括前「女飛魚」、前港隊游泳代表蔡曉慧、瑪利諾修院學校（中學部）校長李錦霞、慈善機構「庭恩兒童中心」創辦人黃何淑英及油尖旺區議會議員鄧銘心。另外，再獲委任委員包括洪雪蓮、關蕙、龐愛蘭及蘇潔瑩。
李八方