【我們的演唱會】曾幾何時，香港人最愛電視撈飯，當年電視劇主題曲更如老火湯令人回味無窮。71歲的黎小田，75年加盟麗的電視任音樂總監，短短8年間作過《大地恩情》、《天蠶變》、《戲劇人生》等數百膾炙人口的主題曲和插曲。下月17及18日，黎小田於紅館舉行「小田金曲50年」演唱會，便請來周華健、陳曉東、陳美齡、葉振棠等演繹其經典作，原本黎小田力邀關正傑出山，但最終未能成功。
搵新人怕比較
日前黎小田接受專訪時說：「有打過畀佢，佢覺得真係退休，連則師都退埋休啦，所以佢都唔肯出嚟。」黎小田指當年無綫與麗的連主題曲也會鬥一番，有次顧嘉煇為鄭少秋寫《楚留香》，未出街前給他欣賞，由於麗的同期開拍同樣題材的《俠盜風流》，黎小田為怕比下去，於是走精面，他說：「我走精面搵咗個新人陳秀雯唱，起碼出嚟冇得比，橫掂唔夠fight。」
「新秀件衫唔得」
82年黎小田帶張國榮過檔華星唱片，成功捧紅對方，又舉辦《新秀歌唱比賽》打造百變梅艷芳。黎小田說：「當年佢喺舞廳唱，我啱啱搞新秀，有個行家話有個女仔唱得好好，叫我上去聽吓。一聽，呢個好似徐小鳳，咁就叫佢參加新秀，佢認得我，好耐之前佢同家姐（梅愛芳）參加過我哋《家燕與小田》，咁佢就驚，話帶埋家姐嚟。佢真係唱得好好，評判一致畀個冠軍佢，係無綫做畀佢嗰件衫唔得，娘咗少少，所以後尾劉培基幫佢全新打造，咁就變咗個百變梅艷芳啦！」
採訪：戴彩煥
攝影：陳慧安
場地提供：Dada Bar + Lounge