前日遇到一位創業／私募基金「拍拿」（即合夥人）D君；講起亞洲金融論壇會在一月十五日至十六日，在會展舉行，今年係第十一屆，由貿易發展局主辦，本港金融投資界全力支持，預料有近千人出席，對宣揚香港係世界三大金融中心之一，有重要形象作用。
創業基金會有一個InnoVenture Salon環節，貿發局事先篩選咗一啲初創公司（主要來自科學園與數碼港之初創培植計劃，但亦有獨立公司，目前上環乙級商廈有不少科技初創公司），讓佢地參加AFF Deal Flow環球投資項目對接會，等創投基金「選新抱」。初創公司要搵資金支持，創投基金要搵有潛質之投資項目，AFF Deal Flow就起了一個媒人橋樑作用。
D君話香港在2017年之初創投資額幾唔錯，有已達成熟程度之公司獲得大額資金，例如商湯科技（源於中文大學教授研究成果）完成B輪融資，籌得約二億九千萬美元……本港大學係科技公司堅實後台，三間著名獨角獸如大疆（科大教授、學生所創）、商湯科技（中大），及無創產檢嘅盧煜明教授（中大）有關嘅一間公司，D君認為目前香港加深圳擁有大量創投基金，錢多得滯，深圳有初創環境氣氛，香港有優良大學研究可發展，故此可在粵港澳大灣區推動科技創業，已有天時地利人和之便，佢最希望香港大學生能在AI、FinTech、BioTech與互聯網研習方面，能下工夫，有所突破。
咁又即係講番STEM教育，唔識數學、物理、化學、生物與工程及電腦，根本無從說起。與D君拜拜之後，新亞師弟電腦J送來一本新書，乃係佢死黨黃秉華（新亞人類學84）寫嘅，書名叫做《STEM for Parents你懂的》，星島出版社出版。黃秉華畢業後就做記者，在信報、星島、壹週刊工作多年，主編過「電腦廣場」，又寫過一本博益出版嘅《IT風雲錄》；讀人類學而精通電腦行業，應該係新亞書院人文教育之功，頭腦靈活懂變通，識得終生學習吖嘛。呢本書並非學術著作，而係以採訪寫作30年嘅經驗、筆觸，向家長提供一個培育子女學習STEM嘅框框，由幼稚園就開始，如何從K1規劃到中六，自行培育，適當地配合學校課程。前日左丁山先至講過，今天孩子要學的STEAM，實在太多，如何不過早毀掉孩子的學習樂趣，係一個大難題，不妨讀吓黃秉華呢本書，得個大概先。