無綫劇集《跨世代》播到尾聲，陳豪、李佳芯同森美噚日繼續以劇中角色組合，出席尖沙嘴舉行嘅手錶店開幕剪綵，陳豪同李佳芯仲以「夫妻」身份，齊齊坐飛船出場，到影大合照時，森美就刻意畀陳豪企中間，講笑話想令佢有左右逢源嘅感覺。
之後陳豪接受訪問就話，劇集拍咗50集，大家都有咗默契，呢個組合好難得。問佢會唔會好唔捨得？陳豪就講笑話自己係多產型，一個劇集嘅結束，就等於新嘅劇集開始。佢話：「今次多咗好多好朋友，大家都經常見面。」李佳芯即刻話：「係呀！今日係阿聰（張繼聰）生日，我哋都有喺group祝佢生日快樂。」
睇好苗僑偉
陳茵媺日前出席活動，力撐老公會攞視帝，陳豪即笑住話：「咁老婆一定撐老公，等於我都會撐佢。」有冇信心攞獎？陳豪就話信心加平常心，又話攞唔攞獎要講運，佢本身就睇好三哥苗僑偉，而劇中老婆李佳芯就話一定撐陳豪，仲話拍劇時陳豪畀咗好多衝擊佢。
撰文：馮仁昭