法國時裝品Chanel嘅Mademoiselle Privé展覽之前喺倫敦、首爾舉行，星期六開始喺中環PMQ元創方免費有得睇。
展覽入口配上Chanel女士剪影霓虹燈，全場分三部份，首先係紅色點綴嘅都巿花園，可以一邊散步一邊欣賞香港站獨有嘅兩位本地藝術家設計作品，包括SK（林樹鑫）嘅「Camellia Light」布製山茶花燈，而又一山人作品「大珠小珠落玉盤」，則播放珍珠落地畫面。
展覽亦大玩感官體驗，花園背後巨型純白香水盒揭秘N°5香水配方，黃銅裝置還原成品當中各種香味，解構點解當初要用合成嘅味道，原來都同創新有關。
雖然費用全免，但記住先以手機app「Mademoiselle Privé」預約，入場後又可以用嚟了解展覽訊息同睇片。
