【本報訊】連日旁聽聆訊的死者母親昨親自結案陳詞，直言青山醫院把看漏兒子血糖指數異常解釋成「睇漏眼」是不能接受，「小小嘅過失帶走一條生命，唔值得囉」，睇漏眼之說亦縈繞她心頭多年，在腦海不停盤旋，傷痛至今難抹掉。母親憶起兒子臨終前情況曾好轉，有如「迴光返照，同我交帶好多嘢」，令她原本滿懷希望。
死者尹耀明家屬一方在今次死因研訊沒有律師代表，昨完成證人作供後，死因裁判官一度想押後片刻，讓家屬預備即場陳詞。
死者弟弟尹耀昌婉拒，「其實都唔係好使（押後），想講嘅嘢，呢幾年都不斷咁講」。
回看似迴光返照
死者母親林芝華陳詞時表示，兒子由入院至去世，家屬甚至兒子本身都未獲告知血糖升至危險水平。她事後翻看文件，發現兒子血糖讀數曾飆升至51（正常人不多於10），感到「好驚嚇，點解唔通知阿仔？」本身在公立醫院從事技工的尹母稱，聽朋友說，血糖值51的病人多已近乎昏迷「唔識醒」，但尹死前精神狀態及血糖量曾有好轉，「可能係個天嘅恩賜，嗰幾日個仔同我交帶好多嘢」，現在回看事件恍如兒子迴光返照。
尹母指事件令家人大受打擊，不接受青山醫護稱對血糖讀數「睇漏眼」及「唔知點解睇唔到」。
尹母坦言青山醫院病人有精神問題，與常人不同，聽醫生講解時可能表現得明白，但隨後未必有能力監察自己情況，希望青山醫院用藥時除知會病者，亦應詳細向病人家屬講解副作用等，以免重蹈覆轍。
■記者伍嘉豪