【本報訊】6蚊串魚蛋、19蚊碗自家製盅頭飯，還有冬天必食的20蚊碗臘味糯米飯。主打價廉物美的小食店「萬事達」下周四將告別美孚，店主指即使已4年無加價，但面對同區連鎖店圍攻，心力交瘁，惟有結束逾20年來的心血。
萬事達小食店位於美孚新邨三期，店主陳先生說，父母1994年在美孚新邨做雞蛋仔小販起家，其後搬至附近小舖位賣小食，7年前搬至現址，月租近10萬元，「盅頭飯係自己蒸，肉都係自己醃，攞貨返嚟冇保證」。陳說，現時的營業時間為上午6時至翌日凌晨3時，「熄燈冇耐又要開始預備」。他續指，父親近年過身，現時由他和65歲母親輪流開檔，每更踩足24小時，身體嚴重勞損，「你叫個老人家點做24個鐘？」
不敵連鎖店 4年無加價
不敢縮減開檔時間，全因同區競爭越趨激烈，有新入場小食店更跟隨其店的營業時間，及以更便宜價格作招徠，「賣魚蛋，出面轉彎有龍津；賣盅頭飯，嗰邊有唐記；賣車仔麵，出面都有間車仔麵」。為免客人流失，食物亦自4年前起無加價，而附近的連鎖小食店龍津美食，不少小食均比萬事達便宜，其中一串魚蛋燒賣10元買一送一。「咁樣撐落去，等於一間同出面幾間去鬥，真係好攰」，陳說面對營運壓力沉重，心力交瘁，惟有結束一家多年來的心血，下周四結業，「最唔捨得就係啲街坊，好多都係阿媽睇住大。見到細路仔，又會拮多粒魚蛋畀佢，但真係冇辦法」。
小店不敵連鎖店，不少街坊感不捨。在附近洗衣店工作的林女士說，該店不時交工作服到其洗衣店清洗，「佢哋由朝做到晚，見到啲衫好污糟，感覺到好辛苦」。
■記者李詠希
街坊心聲
許伯：
「幫襯咗4年，佢哋啲嘢食經濟啲。其他小食店見到佢哋（萬事達）好生意，就喺附近整番間，人賣牛雜佢賣牛雜，咁咪頂死佢。」
林同學：
「一個禮拜幫襯兩、三次。其他舖頭啲魚蛋都係冷藏嘅，煲返熱就算，掛住賺錢，唔理啲肉好唔好食。呢間肉質好啲，唔想佢執。」
