律政司司長鄭若驊僭建風波未平，特首林鄭月娥昨在立法會答問大會自爆容許鄭繼續「兼職」，完成手上6個仲裁個案，而涉及的收入會交給政府處理。有法律界及政界對林鄭開此極壞先例，譁然之餘亦大惑不解，當中可能涉及的潛在利益衝突、以及特首為何容許問責官員有特權，可以上任後仍從事收取報酬工作，隨時成為另一個政治炸彈，林鄭亦無法置身事外。
未交代潛在利益衝突
有法律界中人直言，不論林鄭將今次安排包裝得如何動聽，事實就是特首不知引用甚麼條例及權力，批准司長可以從事私人業務，並可收取報酬，「整個安排係開咗一個好壞先例，竟然容許問責官員做私人嘢，點解唔可以等佢做埋手上仲裁個案先上任？」特別是找鄭若驊做仲裁的相信不是一般中小企，隨時是香港甚至內地大型企業，「當中有冇潛在利益衝突？呢個林鄭冇講清楚」。
另一政界人士奇怪，若真如林鄭所說，鄭若驊只會在短期內繼續處理未完仲裁個案，「如果只係一、兩個月，點解唔叫袁國強留任多一陣？係咪袁國強連留喺林鄭政府多一個半個月都唔肯？」若林鄭所謂「短期內」不只一、兩個月，而是3、4個月甚至更長，「咁容許一個律政司司長長期兼職做私人有酬工作，咁樣做對整個問責制會造成好大損害」。
他又說民主派一定不會放過林鄭，要她交代為何容許鄭「兼職」及6個仲裁個案涉及公司，當中有否利益衝突，而從建制派昨未有出口保鄭，若僭建、兼職風波再燒下去，林鄭將不能置身事外，「到時建制派會唔會幫林鄭硬頂呢？民主派好期待睇建制派有乜反應」。
周一、三、五刊出
季陶