新年首場政圈好戲，噚日喺立法會上演，被爆僭建嘅律政司司長鄭若驊同對佢「一言久頂（想講持久頂住啫……）」嘅特首林鄭月娥，雙雙擔綱做特首答問大會女主角。但一場花生騷，配角有時更搶鏡，幾位男丁噚日明顯出其不意搶到fo。
大嚿石高境界噴火
經民聯石禮謙嘅母語係英文就人所共知，但若果話佢嘅第二語言係中文就大錯特錯，熟識大嚿石嘅人，相信都知道「諷刺」先係佢嘅第二語言，呢點呢，連娥特都「不容置疑」。
大嚿石喺噚日答問會有機會露一口，佢開初打開口牌話明唔會問樓價、唔問土地供應，事關林鄭都面對緊呢啲問題，同時連辣招都唔問喇，因為辣招實行咗7年，啲樓價咪一樣日日升、二手樓交易又日日見低點，話完一輪之後突然話鋒一轉，話自己關心嘅其實係少數族裔得唔得到公平嘅接受教育機會。
查實話唔問箒，已經喺提問中表達晒意見，難怪林鄭聽完都笑一笑，大讚石禮謙「不愧為本會最老練嘅議員」，一邊話唔問樓價、辣招，另一邊就「三言兩語發洩咗不滿」，結果係鄭連答嘅機會都冇，企定定硬食大嚿石嘅批評！
夢中人瞓着也中槍
噚日答問大會上一大亮點，當然係夠晒資歷嘅經民聯石禮謙表現咗佢嘅高超「諷刺力」，連特首林鄭月娥都讚嘆不絕，似乎都想有樣學樣，食住建制派陳健波問佢有關工作同生活平衡問題，令自由黨張宇人「瞓」着也中槍。
事緣波哥席間單刀直入同林鄭講，有調查顯示香港人嘅快樂指數低，相信係工作、生活壓力大所致，希望政府推生活工作平衡，例如搞吓彈性上班、在家工作咁樣。
林鄭最初就話認同波哥講嘅嘢，但另一邊又笑笑口話喎，推出咩嘢措施都要平衡，就好似佢見到面前嘅張宇人，一聽到波哥講有關假期問題嗰陣，就唔知係皺眉頭定瞌眼瞓，所以要平衡僱主同僱員兩邊囉！現場鏡頭繼而影住張宇人，見佢又似乎識望鏡頭冇瞓着噃，唔通就係娥特一言驚醒夢中人？
日哦大師 點化月娥
話說上兩屆立法會中，代表廠商會嘅工業界議員林大輝同《稅務條例》39E之間基本上係有個等號，因為大輝鍥而不捨咁為業界爭取放寬呢條法例。家陣特首變成林鄭，廠商會議員代表又換上吳永嘉，情況有冇變？
吳永嘉噚日喺答問大會上，除咗建議林鄭諗吓將商業登記嘅寬免措施變為恒常，幫助業界，都有繼承前人大輝經常掛喺口邊嘅39E，佢話正正係𠵱家業界想配合一帶一路、大灣區規劃嘅時候，阻礙佢哋向外闖嘅舊法例。
林鄭回應時坦承，都有就39E做過研究，因為佢喺上屆政府唔係管財政，齋聽大輝點樣講到聲嘶力竭，已經覺得大輝講得有道理，強調大灣區都話要人流、物流、資金等自由流通，所以39E嘅問題係有得諗，似乎大輝當年日哦夜哦嘅苦心，冇白費喎！
果欄王登場搞活化
娥特答問會，焦點去晒新官上場就點起一大把火嘅律政司司長鄭若驊身上，但仲有一啲議員不問政治、關顧民生，批發零售界嘅自由黨邵家輝就跟進油麻地果欄喺2016年10月一場大火後，逾40個受影響商戶無法復業，指果欄有百年歷史，問娥特可唔可以將佢活化，打造成旅遊景點。
林鄭聽完執到寶咁，自言希望送油尖旺區一個大禮，指果欄既係歷史建築，行業亦係市民嘅集體回憶，點樣可以活化保育，係本屆政府工作，繼而點名話呢個工作係交畀民政事務局局長劉江華負責，強調呢屆政府特色係每個job都搵人跟，唔可以你又跟、我又跟，仲叫大家喺此事上唔好搵商經局局長邱騰華局長，唔知係咪唔想大家推莊！昔有欄王劉翔，今有果欄王劉華，唔知邊一個欄，要創佳績係更難？
李八方
