法庭真係一個活到老學到老嘅地方。噚日上訴庭處理網台主持鄭永健賄賂傘兵出戰區選𠝹票單案，鄭霎時提及年輕人最愛嘅高登討論區一則帖文，內容係關於「會出戰嘅巴打絲打名單」。上咗年紀嘅法官楊振權聽到即刻問：「即係咩？咩係巴打絲打？」鄭搶答：「即係高登會員。」估唔到坐喺楊官隔籬嘅法官潘兆初都幾貼地，即刻話「即係brothers and sisters，弟兄姊妹。」楊官恍然大悟。
潘兆初貼地解釋
鄭其後又叫法官閱讀一篇名為〈巴治奧分析〉文章，解釋埋「巴治奧即係梁頌恆英文名。」楊官睇完有啲疑惑咁問：「英文名？」隔籬嘅法官彭偉昌就話「我都睇唔到英文名……」潘官再補充：「係呀，梁頌恆個英文名叫Baggio，我審過佢單案。」原來鄭所講嘅巴治奧即係Baggio。平時審案可能係67歲嘅楊官lead住兩位後輩，但講到年輕人潮語，點都係後輩carry番啲大佬嘅。