支聯會艱苦經營咗兩年嘅「六四紀念館」，2016年喺業主立案法團訴訟纏擾下閉館。紀念館雖暫時關閉，但支聯會傳承歷史真相工作並無中斷，除咗積極推動眾籌擴館，今年維園年宵攤位，亦會如去年一樣，佈置成迷你「六四紀念館」。支聯會今年投得維園年宵1號和2號攤位（近港鐵天后站興發街入口），將於2月10日（年廿五）開檔，至2月16日（年初一）清晨結束。
用手機講「民女」故事
支聯會噚日就喺fb預告，今年會用講故事形式介紹民主女神故事，包括八九民運期間，北京天安門廣場豎立嘅民主女神像，由邊個製作、身高幾多，以及點解會面向毛澤東像？巿民只要用Android手機「負片」功能或iPhone反轉顏色功能，再開相機就可以瀏覽迷你「六四紀念館」展覽相片。
支聯會亦製作咗劉曉波遺孀劉霞嘅詩句布袋同水杯，以及不同形態嘅民主女神杯緣子，亦會展銷「六四」記憶棒、燭光集會文件夾、民運歌曲專輯同「六四」書籍和T恤等，政治漫畫家尊子同馬龍亦會為市民畫肖像，替「六四紀念館」籌募擴館經費。