所謂否極泰來！本地練馬師蘇偉賢這晚（10日）在谷中終重開勝門，佢憑與雷神莫雷拉合作的大熱「友享友賞」，攻下第二場四班1200米，從而取得馬房近一個月內兼2018年首捷，而此駒單Win及組合獨贏A1分別派29.5及16元。
自上月6日國際騎師錦標賽之夜勝出「夢幻仙子」以來，蘇偉賢唔理冷熱，逢出例輸最叻第二，當中包含唔少熱門甚至大熱門，而佢同雷神合作熱門馬最近亦做咗票房毒藥，包括「君達星」剛周日（7日）於田草大熱倒灶跑第二。
今晚蘇偉賢、雷神組合卒之識贏大熱門，「友享友賞」沿途穩守第二位，咬住放頭馬「自由旺」跑。直路大部份時間「友享友賞」都處於下風，卒之追到終點嗰步，及時超越「自由旺」以短馬頭位之先獲勝，過程驚險萬分，難怪有表情王之稱的蘇偉賢，賽後周圍同人擊節，甚至自己握拳歡呼，表現得非常激動，大有吐氣揚眉之勢。
蘇偉賢表示近期手風欠順，多次跑得位置，對他來說是一大個test考驗，他表示等了這場頭馬很耐，「友享友賞」馬主張展明是新馬主，蘇偉賢感謝張展明的耐性和支持，他又讚此駒忠心準繩，多次跑得近，今場贏得驚險，好似追嚟追去都追不到，他都打定輸數，結果力壓「自由旺」取勝，令他鬆一口氣，馬房終於走出谷底。
第二場亞軍由蘇偉賢師傅方嘉柏馬房的啡燈馬「自由旺」拎到，三、四名分別為「劍凌雲」及「指揮官」，四重彩派三萬蚊鬆啲。