今周主題：點睇古天奴出走？
古天奴（左）離隊簡直傷透利迷心，而呢一單交易唔單止反映咗南美球員嘅巴塞情意結，仲確確實實咁話畀紅軍球迷知，紅軍根本冇能力留住當家球星，班主FSG亦都冇心想搞起隊波。
首先講巴塞情意結，遠啲嘅有馬斯真蘭奴，近嘅就有蘇亞雷斯同埋古天奴，佢哋一聽到巴塞嗰名就眉飛色舞，不惜一切就算打後備都要轉會。
馬斯當年都走得好肉酸，罷操之餘仲拒絕為紅軍披甲，終於得償所願轉投巴塞！
其次紅軍主帥高路普真係好有魅力，阿歷士張伯倫同埋華基爾雲迪積克寧願唔要高薪，都要嚟紅軍為佢效力，呢一點真係勁過前任主帥羅渣士幾皮。但諗深一層，點解高路普咁有魅力都留唔住古天奴？原因好簡單，除咗上文提到嘅巴塞情意結外，呢個都同紅軍嘅爭標能力有關。古天奴打咗利記五年表現唔錯但盃都冇隻，所以你話功利又好，人望高處又好，去到巴塞半季就好大機會捧盃，想走都好正常箒。
最後想講嘅係，FSG嘅業務重心始終唔係紅軍，其實係喺美職棒波士頓紅襪度。始終係商業社會，賣人買人係好正常嘅決定，但無邊隊「強隊」會喺季中關鍵時間賣走進攻主力，呢啲都證明FSG冇心搞起隊波，只係想紅軍穩穩陣陣排喺聯賽榜上半頁就算！
文：聰鳴