今周主題：點睇古天奴出走？
就喺官方宣佈古天奴加盟當日，有朋友喺群組發短訊，問其中一名巴塞球迷點睇呢單轉會，嗰位朋友嘅反應非常直接，「我寧願畀羅拔圖（圖）（沙治羅拔圖）上位。」
呢個係咪普遍巴塞球迷對古天奴加盟嘅睇法呢？我唔清楚。客觀而言，多咗一個球員，而且係「一億六千萬先生」，總有球員嘅上陣時間被犧牲。而且，古天奴唔可以喺歐聯上陣，換句話講，幾可肯定佢係西班牙盃賽場嘅必然正選，咁只能夠等待喺西盃上陣證明實力嘅一眾小將呢？
青訓係巴塞多年嘅金漆招牌，拉瑪西亞之所以人所共知，就係佢能夠不停培育新血。而每個從激烈競爭中脫穎而出，躋身一隊嘅年輕人，都能夠帶畀球迷驚喜，呢條晉升階梯，一直係巴塞美好傳統。只係近年，留畀新人嘅舞台，似乎越來越狹窄。
呢十年，我哋見證過唔少「新美斯」點樣隆重登場，又點樣打回原形。置身巴塞呢種頂級球隊，唔容許任何教練給予任何新人無限機會，即便哥迪奧拿回巢接手如是。然而情感上，可能巴塞球迷仍然希望，下一個當家球星，都係拉瑪西亞出品。喺高興古天奴加盟嘅同時，佢哋都默默為沙治羅拔圖、拉芬拿、迪路菲奧，同埋丹尼斯蘇亞雷斯打氣。
文：亨少