下個月中迎新春，兩位大王──蘭花大王楊小龍及年花大王賴榮春噚日率先同大家講吓買咩花添喜慶。
楊生就帶埋公子尹俊出嚟同大家拜個早年，應節蝴蝶蘭少不了：紅系蝴蝶蘭「花碟迎犬」、「犬臨繡春」玩蝴蝶蘭花瓣上的斑點；「玉犬呈祥」、「瑞犬報喜」就玩淨色。
蘭花王賣2.8萬元
不過，佢哋點都唔及今年蘭花王「恩桃」勁，足足用咗8年時間將台灣種子、日本培苗嘅蘭花移到本港種植，得200幾盆非常矜貴，八菖賣緊2萬8，價錢比日本來貨平一半。楊小龍話今年農曆十月並冇早暖，所以蘭花都生得幾靚。
年花大王賴榮春就話今年情人節撞正年廿九，業界人手緊張，花價可能升一兩成。
另外，東港城室內年宵市場2月2號開幕日會有限量100支8蚊開運花「甜蜜蜜」搶購，寓意情侶感情細水長流。