上天好公平，關咗一扇門就會打開另一道窗，噚日喺新鴻基地產聚會，家長阿May分享話讀5年級仔仔汶軒喺學校係Top Ten，出名曳，原來仔仔有情緒問題，但同時係資優生，「唔使讀書都年年考第一」。
阿May個仔仔後來參加咗新地贊助嘅「新地資優科學創意發展計劃」，學習科學等知識。阿May話有次聚會仔仔見到新地執行董事郭基煇，返嚟同媽咪講：「郭生話第時請我去佢公司做呀。」
八方向郭基煇求證，佢話都記得個細路好醒目，當日叫佢勤力讀書，大個去新地工作：「有幸請到佢係我嘅榮幸。」𠱁到阿May笑住講多謝，咁開心當然唔係望子成龍到呢個地步啦，只係要照顧過度活躍嘅資優小朋友唔容易，尤其係旁人嘅白眼，仔仔得到認同梗係開心啦。