曼迷對布里斯托城有冇印象？佢哋喺上月英聯盃八強爆冷踢走曼聯，到周二英聯盃四強首回合對住另一支曼市球隊，英超榜首曼城幾乎又上演好戲。
曼城主場出擊先失波，最後靠阿古路完場前入波以2:1反勝布城，連哥帥賽後都對呢支英冠球隊讚不絕口。僅負藍月，原來係布城喺今屆英聯盃連續第五場比賽對英超球隊，全部都贏盤認真犀利（見附表）。
史東斯送禮輸12碼
布城喺上月英聯盃八強主場迎戰曼聯，由哥利史密夫喺93分鐘入波，以2:1絕殺紅魔晉級。到周二準決賽首回合先作客出戰曼城，布城又嚇你一驚，完半場前卜比列特喺禁區內被藍月中堅史東斯鏟跌獲判12碼。卜比列特親自操刀搞掂。
曼城喺呢場波人腳其實唔差，領隊哥迪奧拿收起咗大衛施華同艾達臣摩拉斯，但正選陣容仍然有奇雲迪布尼同史達寧等主力。落後下藍月到55分鐘扳平，正正就係迪布尼同史達寧配合，前者喺無人看管下射入。到補時兩分鐘，後備入替嘅阿古路接應貝拿度施華傳中，近門頭槌頂入，今次到布城被絕殺輸1:2。雖然未竟全功，布城仲有次回合追，兩星期後返主場進行次回合賽事。
哥帥賽後亦對布城讚賞：「唔理任何賽事，要打入準決賽階段都係唔容易嘅，我哋早就預料到布城好難搞，事實亦係咁樣。佢哋有部署、有速度、知道點樣對付我哋，所以到次回合喺作客情況下肯定又係好難踢。」
盃仔事小升班事大
布城今季英聯盃殺到入四強可以話係超額完成，佢哋由第二圈起到今場，連續五圈對手都係英超球隊，結果所有越級挑戰嘅比賽都係贏盤收場，包括今場對曼城，「讓球」盤受讓兩球半/三球，袋袋平安。不過贏唔贏到英聯盃，其實唔係布城今季最大目標，升班英超先係主菜。自從今季英冠首輪賽事之後，布城最高曾經坐過喺次席，但最近成績回落，近兩場聯賽先後輸畀狼隊同阿士東維拉，要喺下季英超再同雙曼鬥，要加把勁咯！