娥特任內一大任務，就係改組上屆由梁粉操弄嘅中央政策組，變為政策創新與統籌辦事處，仲招攬年輕人加入。據知由組長羅志康領導嘅改組大計已有眉目，將會成立籌備小組，聽聞小組其中一位副總監，就係煲呔愛將、現任勞福局副秘書長陳羿（Donald），消息話佢會喺22號返新位。Donald喺「煲呔心戰室」打仗時，唔少人讚佢多計，而創新辦歡迎新政策諗頭，唔知籌備完成立，Donald會唔會順利過渡？至於佢嘅現職，據聞由「23少」接任。邊位係23少？現任創新科技署副署長黃宗殷2003年任保安局首席助理秘書長時，因為成日陪住時任局長葉劉淑儀出席論壇推銷23條，獲封為23少；事隔15年，23條可能捲土重來，23少雖然唔使再銷23條，但相信新崗位一樣唔他條。