今早(9日)天文台錄得最低氣溫7.9度,是本港今年入冬以來最低紀錄,其中沙田馬場位置空曠,無遮無擋,更是凍冰冰,唔打冷震都唔得,所以現場所見騎師、練馬師等個個都包到實。
不過練馬師蘇偉賢應該好暖,事關他穿了一件充電發熱背心,蘇偉賢仲話件衫可用App來調校溫度,所以個身反而㷫烚烚。
大家印象中鬼佬冇咁怕凍,但偏偏貝湯美就成個幪面超人咁,今早他要策馬試閘,沿途食正大風就更難頂,梗要做足準備,加上湯美仔今年才長駐香港,他來自澳洲,目前當地正是夏天,當然有啲唔慣。
其實辛苦嘅不止騎師,收操後一班工作人員冒住冷雨,整理草地跑道,滋味一啲都唔好受,可算香港賽馬的幕後英雄。
講到近年寒流下跑馬,最經典一定係2016年1月24日,騎師潘頓憶述當日氣溫跌到得番3度,加上落住雨好難頂,感覺條跑道好似大雪櫃,跑完回來自己打晒冷震,塊面僵晒,連開口說話都有難度。