人妻陳敏之近日在無綫劇集中，做第三者介入唐文龍與胡琳婚姻，與唐文龍上演連場情慾戲而引起話題。今次敏之在劇中演出，是入行以來最激、最搏一次，不但獲提名台慶頒獎禮最佳女配角獎，而且更帶挈她工作量大增。日前記者便發現她在山頂與一班小朋友拍廣告，當日天氣寒冷，但敏之仍以背心加短褲上陣，跟小朋友追逐玩遊戲，𠱁得小朋友十分開心。
敏之前年一索得男，不少廣告商睇中囝囝雷子樂，她笑說：「其實啲人搵佢多過搵我，係阿仔帶挈我，但要睇啱唔啱佢，我好歡迎，只係驚阿仔會失控勁喊，如果真係一齊拍廣告可以留念。」
坐完月即落水
敏之今次演出比以前大有進步，她表示又開心又欣慰：「因為做咁多年戲，批評、讚美都有好多，亦有人話我做戲唔好，當然會好氣餒，今次『黃以愛』呢個角色，從未收過咁多留言、短訊，自己睇番意見，啲人真心睇，講得出晒劇情，好多讚美鼓勵說話，一世人未試過收咁多，呢個認同比獎項更開心。」
對於女配角獎，敏之恨攞獎恨到出口：「喺劇集下好多苦功，當時坐完月即刻拍，又要拍落水同情緒波動嘅戲，真係幾吃力，如果得獎對我好大紀念，又覺得個獎可以連繫埋個仔，當時又要湊仔又要工作，都想攞到獎。」
採訪：卓寶花
攝影：陳慧安
