白禮頓（圖）周一晚喺英足盃嘅獨腳戲，主場以2:1擊敗另一支英超球隊水晶宮晉級。唔計重賽嘅球隊，英格蘭足總盃周一晚完成咗第三圈所有賽程，隨即進行第四圈、即係32強抽籤，結果曼聯同熱刺都抽到上籤，只係面對嚟自英乙嘅對手。
白禮頓擊敗水晶宮嘅賽事睇落平平無奇，但其實係視像助理裁判(VAR) 技術首次登陸英倫嘅正式賽事，隨即大派用場！比賽至87分鐘，當時兩隊踢成1:1平手，白禮頓前場罰球，大腳踢入禁區，烏尼美亞頭槌攻門直飛遠柱，格連梅利衝前用身體將個波撞入。由於當時球速過快，曾惹嚟格連梅利手球嘅爭議，但球證馬連拿通過同VAR團隊嘅溝通，指示佢哋幫手回帶睇番入球過程，然後判入球有效，白禮頓就咁2:1淘汰水晶宮，客隊領隊鶴臣都話對呢個入球成立冇異議。
第四圈抽籤後，籤運最好嘅英超隊肯定係曼聯同熱刺，分別作客英乙嘅伊奧維同紐波特郡，過關應該唔難；利物浦就主場對同屬英超嘅西布朗。
