巴西中場菲臘比古天奴，喺周一完成咗轉投巴塞隆拿嘅加盟儀式後，喺instagram寫上千字文，向一眾利迷盡訴心中情，至今已獲得過百萬個Like！
古天奴話自加盟紅軍嗰刻，就感受到球迷無盡嘅支持，大家共同經歷過難忘嘅時光，希望自己曾經為球迷創造開心嘅回憶。古天奴又重申：「加盟巴塞係我嘅夢想……但紅軍同利迷喺我心中嘅地位永不磨滅。無論我身處何地，我一生都會珍而重之咁將利物浦長留心中，呢間球會、呢個城市同所有球迷，永遠都係我嘅一部份。You'll Never Walk Alone.」
不過唔係人人都接受到古天奴「背叛」紅軍嘅舉動。有利迷發現加盟紅軍僅半季嘅阿歷士張伯倫，不但冇祝福古天奴，仲喺ig同古天奴「絕交」，停止追蹤對方。唔少利迷得知張伯倫嘅舉動後，紛紛大讚同倣效，甚至有利迷話張伯倫嘅忠誠，係紅軍未來隊長嘅人選！
