呢日午飯過後，由遮打大廈行天橋去IFC，天橋上當然有好多行人，而不少香港人講話係好大聲嘅，隔兩三個「馬位」都可以聽得見。左丁山就聽到背後有女士大聲講：「啲人話唔好讀會計喎，遲早電腦，即係話AI喎，會取代晒會計，到時會計會冇工做。」回頭一望，係兩位貌似OL嘅女士邊行邊傾，唔知係講佢地自己吖，還是講自己嘅仔女嘅職業前途問題。
OL關心AI，可知AI取代人類唔係英文replace，而係displace，已開始提上人類議程，大家開始有啲擔心嘞。AI是否可以完全取代會計人員？未必全部可以，但做日常簿記（book-keeping）工作，冇話唔得啩，就快所有商業錢銀交收會用晒blockchain（板塊鏈），電子支付，唔會再有紙張發票、收條呢回事；全部銀紙結算，都透過電腦，故此AI程式做埋簿記會計工夫，百分百可行，如此一來，左丁山五十年前考甚麼LCC Higher文憑，預備入唔到大學就考會計師樓或到洋行做簿記員（book-keeper）呢啲工種，必然大量消失，令中學生又少咗一類穩定工作職位。
要做甚麼工作先至不會被AI取代呢？係年青家長及教育界必須開始考慮、研究、面對嘅課題。內地超級市場本來係用大量基層僱員如收銀員、執貨員、特別攤檔售貨員等等，在IFC行入去city'super就知道場內有幾多工作人員每月出糧，養家，但內地已有阿里巴巴無人超市，京東超級智慧超市7Fresh，大量削減工人數目，7Fresh正計劃在全國開設1000家分店，規模係大，但僱員數目就少，對創造工作職位，美國特朗普總統日日掛在口邊嘅job creation毫無幫助。
行到IFC，碰到一間跨國企業的公關，順口問佢驚唔驚AI代替埋公關，令佢自己失業？公關L苦笑：「希望做多20年，等我60歲退休先至取代啦！目前彭博啲公司業績稿已由機械人撰寫，我地啲公關新聞稿遲早都可以由機械人寫埋嘅啫！不過大公司係只敢做，不能說，我地歐洲總部傳來通知，以後對外發佈資料，不要提及AI、robot之發展及應用，以免刺激傳媒報道話我地公司用AI取代人手！喺歐洲，呢樣嘢係高度政治不正確，隨時引起工會反彈！」咁咪即係掩耳盜鈴？公關L話：「公關聲明要絕對政治正確，否則就係找死，你最好都係唔好寫咁多關於AI取代工人！」