香港呢幾日咁凍仲要落雨，唔知大家又點樣禦寒呢？有錢有假嘅朋友不妨可以學吓曼聯嘅做法，拉大隊去中東杜拜集訓，享受一下和暖嘅天氣。不過班球員有得唞，摩佬就似乎冇得唞囉，據報摩佬一方面想說服馬體會前鋒基沙文加盟，一方面又想勸掂盛傳唔肯績約嘅費蘭尼留隊，睇嚟摩佬都係天生辛苦命嘞！
趁空檔到中東叉電
話說曼聯上禮拜五晚踢完對打比郡嘅足總盃第三圈賽事後，要到下周一先有英超比賽對史篤城。有見及此，領隊摩連奴就連同成班球員，浩浩蕩蕩咁拉大隊出發去杜拜，避開嚴寒天氣。出發前摩佬接受《MUTV》訪問，表示有個假期叉電好重要：「我哋啱啱喺14日踢咗五場波，所以要把握寶貴時間休息，畀球員復元，對下半季都有好大幫助！」
查實曼聯有呢個假期，都要多得史篤城，事關史篤城若果喺啱啱嘅足總盃第三圈，打和高雲地利要重賽嘅話，好可能影響埋曼聯對史篤城嘅英超賽期；估唔到史篤城最後連乙組仔都輸，領隊曉士都被炒，令到曼聯可以安心放吓假
基沙文老婆成關鍵
不過據《ESPN》報道，紅魔鬼一直心儀嘅目標基沙文，仍需要多費唇舌進行遊說工作。事關基沙文現時嘅贖身條款僅值一億歐元（約9.36億港元），相對巴黎聖日耳門前鋒尼馬嘅2.22億歐元，以及巴塞中場菲臘比古天奴1.6億歐元嘅轉會費，絕對係非常吸引嘅價錢。不過報道指基沙文嘅老婆竟然「做架樑」，對於離開馬德里去曼徹斯特有保留，所以基沙文可能聽老婆話，留喺西班牙效力，咁亦令到巴塞隆拿有機可乘。
摩佬除咗要擔心基沙文被搶走外，仲要多費心思勸服陣中主力留效。其中一直受到摩佬器重、屢成球隊後備奇兵嘅「爆炸頭」費蘭尼，同曼聯嘅合約今夏就到期，據英國《太陽報》透露，呢名比利時中場已拒絕續約，仲同領隊摩連奴表達希望離隊、接受新挑戰咁話；報道仲話摩佬希望透過今次嘅杜拜集訓，好好同費蘭尼傾吓，說服費蘭尼繼續效力。即管睇吓一向好有牙力嘅摩連奴，可唔可以𠱁得掂費蘭尼續約喇！