今早寒風凜冽，相信好多人都要掙扎一輪，先可以由暖笠笠嘅被竇起身返工。不過噚日一朝早，貴為行會成員嘅新民黨立法會議員葉劉淑儀，竟然冇留係特首辦入面等開行會，反而同徒弟陳家珮Judy喺示威區食風，之後仲見到鄧家彪都喺示威區出現，頂住冷都要向林鄭請願，就知道補選近了，建制派又要做嘢了。
建制派雲集 為補選吸like
政圈皆知本身係南區區議員嘅Judy，好大機會代表建制派選港島區立會補選，下星期就開始提名，梗要快手做嘢。唔知葉劉係咪怕Judy唔夠經驗，定怕林鄭唔認得Judy，所以佢開行會前半個鐘提早落示威區為Judy撐場，舉牌要求政府加強東區醫院嘅緊急中風治療服務，仲話佢哋下晝會開記者會交代事件。林鄭入去開會時見到葉劉同Judy，亦好畀面走埋去傾，葉劉為撐愛將，真係唔話得。
除咗新民黨呢pair師徒外，盛傳參與新界東補選嘅鄧家彪，呢排亦係行會常客，佢噚日就孖住勞工界立法會議員何啟明，要求政府盡快取消強積金對沖制度，真係相當勤力。
不過有時爭到曝光又未必係好事，好似有意參加九西補選嘅民建聯深水埗區議員鄭泳舜，日前喺facebook貼出同Chef Le Mon謝霆鋒落區，去深水埗明哥陳灼明間舖幫手整飯盒嘅相，事後俾網民鬧爆佢抽明哥水，真係得不償失。
李八方