粵港澳大灣區呢個阿爺新baby，促成一班政府前官員敍舊！話說首屆粵港澳大灣區衞生與健康合作大會噚日喺惠州舉行，食衞局局長陳肇始率團出席並致辭。大會由三地政府主辦，推動大灣區內衞生同醫療合作；政府代表固然多，但獲邀講者同參與者份量都唔弱，新風天域主席梁錦松及醫療副主席譚志源繼續獲邀登場，阿松仲就大灣區醫療養老及生命科技合作新模式發言。
數一數在席嘉賓，真係唔少前高官同公職王，包括世衞前總幹事陳馮富珍、醫管局前主席胡定旭、食衞局前副局長梁卓偉同前局長高永文等。喺呢啲時候，堪稱政圈selfie王嘅譚志源又出動，同一班舊朋友自拍，連惠州市長麥教猛都俾佢捕獲（圖）。