U23亞洲盃A組首輪賽事喺禮拜二舉行，頭場有東道主中國對阿曼嘅比賽。結果坐鎮主場嘅國足大發神威，憑楊立瑜（中）、李曉明同埋韋世豪（左）各入一球，最終以3:0大炒阿曼，奪得開門紅。上半場國足表現活躍，完全壓制對手，戰至30分鐘，即將轉投國安嘅韋世豪左路後腳妙傳畀後上嘅李帥，後者落底後傳中，楊立瑜喺禁區第一時間左腳熨射得手，領先1:0。四分鐘後，又係韋世豪，今次佢喺左路高波傳中，無人看管嘅李曉明衝前飛頂入網，國足領先兩球完半場。下半場阿曼表現無咩起色，去到53分鐘再失一球，姚均晟左路斬中，韋世豪銅頭一搖，皮球直飛遠柱入網。雖然呢場比賽又入波又助攻嘅贏波功臣韋世豪之後因膝傷被換離場，但仍然無阻國足大炒阿曼，用一場大勝作為今次賽事嘅好開始。