揚州炒飯無揚州，粟米斑腩無石斑，難怪有工程師資格另一半又是前度會長的，都竟然盲舂舂唔知間屋有僭建。（千祈咪去港珠澳大橋或者高鐵站查察喔。）
買樓送僭建，警覺性唔高嘛，咪照單全收咯。業主無郁手，無結構性改動過，香港無一條法例告得入。奶媽換馬，果然好眼光，咁啱個名跟湯渣一樣，兩個驊，像兩隻戰馬實Q式，左一邊右一邊把奶媽護在中間。以僭建風波的回應評分，這個若驊，唔弱，雖然第一下被記者震懾住方寸大亂回答「我唔知你講緊乜」，匆匆閃人。待了解揚州炒飯定律後，馬上回應記者，「反思」的速度比大狀公會主席林定國快N倍，用字滴水不漏，將僭建罪責（若然有）卸到最盡，精英心態盡顯。
「睇返轉頭，警覺性可以做得更好」，一語會成讖嗎？N年後，一地兩檢出現結構性改動，西九割肉，遍地開刀，對香港造成無法挽回的傷害。驊姐其時，人已離岸兼貴人善忘，毋須僭建已更上一層樓。論及「返魂無術」被強制腦袋灌鉛水的香港司法制度，又試睇返轉頭，走數當飯食嗎？