俗語有云「三歲定八十」，真係冇講錯，睇吓民主黨南區區議員柴文瀚嘅成長史就會知！阿柴同八方講起那些年，原來細個已經好關心時事，無論中國嘅六四抑或韓國光州事件，佢都相當留意，難怪大個咗會從政。當然呢啲亦係緣份，事關如果唔係近視，佢隨時同公民黨譚文豪一樣，做咗機師衝上雲霄。
政治路啟蒙於六四事件
話說八九六四嗰陣，阿柴得12歲，咪以為小學生就乜都唔知，佢話7、8歲已經開始睇新聞，喺新聞中見到中共血腥鎮壓學生，邊個唔憤怒？諗番轉頭六四都算係佢嘅政治啟蒙，六四後家人仲曾帶佢去維園睇六四民主女神像。
升中後嘅阿柴除咗續關心時事，仲興趣多多，揸飛機係其中之一喇，當年佢仲加入過香港航空青年團，試過喺英國皇家空軍Wessex直升機前留影，但考機師係極之嚴格嘅，由初中開始有近視嘅阿柴，機師夢碎！
經歷過2003年7.1大遊行，阿柴嗰年年尾首次參加區議會選舉，當年區選前佢趁住沙士後嘅平機票，去咗韓國散心，細個已經知道韓國光州事件嘅佢專程到訪光州嘅「國立5.18民主墓地」，光州事件正係電影《逆權司機》講嘅故事，事件中嘅死者都葬晒喺呢個民主墓地作為紀念。其後，佢同年喺南區華富二當選區議員後，自此未嘗敗績。