早前評論美食車時誤稱可以承接私人派對嘅商經局局長邱騰華，經歷上任後小小小風波後再出動，噚日到訪九龍城區參觀位於區內嘅香港盲人輔導會盲人工廠，呢間工廠主要為視障同其他殘疾人士提供工作同訓練機會，協助佢哋自力更生。
咪以為邱騰華噚日係去睇紙皮，查實佢係了解殘疾人士點製作紙箱、產品包裝同文件帶製作嘅訓練情況，仲好欣賞佢哋創立嘅「木廠街19號」自家布藝品牌，再喺社區推廣同銷售，大讚工廠鼓勵殘疾人士發揮創意，同政府推動創意產業嘅政策目標一致。
佢其後視察該區成日都被投訴旅遊巴塞路等情況，邱騰華話政府會密切留意各區旅遊配套設施使用情況，會同旅遊業界同其他持份保持溝通，希望以適切可行措施將旅遊活動對社區帶來嘅不便減至最低。