【飲食籽：識飲惜食】
共享經濟，全球各地都很hit，連今年特首《施政報告》亦提出推行「青年共享空間計劃」。共享經濟，即是將擁有的資源借給其他人，令資源可以更有效利用。共享方式五花八門，共享房屋、共享汽車、共享單車……有沒有想過酒吧都可以共享呢？最近有集團式酒吧亦加入共享大軍，將正式營業以外的時段，借給年輕人搞餐廳，令本地共享經濟又多了一個新平台。
這間酒吧叫Bar Pacific，成立19年，三十多間分店，「我哋大部份舖頭都係由下午四點幾開到凌晨，四點鐘之前舖頭都係空檔，不如將時段借出去畀人用，咁就唔會浪費。」市場總監陳枳瞳（Gloria）說。舖頭空置可以留為己用，肥水為何要流到別人田？「潮流興講共享嘛，我哋酒吧有今日三十幾間分店亦唔容易，最初創業連定價、入貨都唔識，經歷過唔少困難時期，例如沙士、金融海嘯。試過人手唔夠，連幾間老闆都要落場搬酒。𠵱家租金、成本都好高，創業唔容易。我哋已經好穩定，應該回饋社會幫吓人。」Gloria補充。共享經濟分無償及有償，前者免費將資源共享。這個計劃屬於後者，參加者需以「三七分賬」與酒吧分享收入，酒吧佔三成，創業者佔七成。創業者毋須交租金、燈油火蠟，亦不必買廚具，就可一嚐做老闆滋味。「香港創業，最大開支係租金，如果可以慳呢筆錢，基本上壓力唔大，我哋對呢個計劃好有信心。」Gloria說。
開業傳單易拉架宣傳 反應超預期
計劃去年９月推出，反應不錯，酒吧facebook有不少留言詢問詳情。首兩名參與者是九十後，黎卓然（阿然）和邱藝峰（阿峰），揀選了北角渣華道分店創辦泰式粉麵檔。「我哋曾經跟過附近一間小店嘅老闆娘學做泰國菜，一直想試吓自己開一間，咁啱見到有呢個計劃，咪試吓囉。」阿峰說。兩人中學就認識，本身都是打工仔，阿峰是樂器售貨員，阿然是餐廳經理，為了嚐嚐做老闆滋味，一同辭職，參加計劃。「最初都擔心，驚冇生意，始終呢度門面係一間酒吧，點樣令啲人知道有泰國粉麵食係一大難題。」阿然回想說。資金有限，開業時他們只能以低成本宣傳，包括自已派傳單及在門口擺放易拉架廣告。料不到反應超預期，三個月後，收入已等同以前八、九成，「開咗個幾星期已經有回頭客，仲讚我哋啲嘢好食，好有滿足感。雖然冇以前搵咁多，但係自己生意，投入好多。」阿峰說。
客人反應不錯，其中一個原因是零租金，可放更多成本於食物上。他們的「店中店」泰菜小檔，主打五、六款泰越粉麵，如豬頸肉湯河、雞絲撈檬。小食有炸蝦餅及酸辣鳳爪。湯底用鮮雞殼熬，雞絲用原隻鮮雞拆肉搣絲。調味料包括辣椒粉、蒜頭醋、魚露等，都是正宗泰國貨，仿效泰國人做法，每張枱也擺放調味架，有白糖、辣椒粉及辣椒魚露供客人自己調味。
夢想餐廳結合古董藝術 吸收經驗鋪路
食物獲得客人肯定，除了滿足感，他們亦比以前更有自信。「以前我完全唔識煮嘢，連生雞都唔敢摸，𠵱家連阿媽都讚我煮得好食。雖然要早起身買料，冇得去夜街，但生活更加充實。」阿峰笑說：「我以前好大頭蝦，啱啱開始嗰陣有時會唔記得買調味料，𠵱家好咗好多，自已生意嘛，覺得自已成熟咗。」阿然說。
曾子維（Ross）及賴景然（Kenneth）是另一對參與者，選擇在葵芳分店賣墨西哥卷。「我哋行晒三十幾間分店，𠵱間附近最多學校，食肆大部份都係茶餐廳、粉麵店，做午飯市場，我哋覺得墨西哥卷對學生會有吸引力。」Ross說。他跟Kenneth是大學同學，八十後，畢業做過數年市場推廣，就接手家族古董店生意，夢想是開一間結合古董、藝術的餐廳，但對飲食業是門外漢，零經驗，希望透過這計劃吸收經驗，為夢想鋪路。Kenneth則從事醫療科研工作，但有興趣搞飲食業。「我有個朋友搞連鎖式冰室，同我分享工作點滴，我覺得好有挑戰性，好有趣，好想試下。」Kenneth道出自已的創業動力。
他們的大計已籌備七七八八，食材供應商都已找好，打算兩、三星期後開業。由於兩人本身都有正職，目前最大難題是招聘人手。「冇諗過咁難請到，𠵱家請得一個，起碼都要請多一個，如果請唔夠人，就要押後開張日期。」Ross擔心地說。不過兩人的壓力不大，因為投資額微不足道，零租金，亦不必購買煮食設備及裝修，資金主要用於預備食物。「基本上係零壓力，唯一比較大限制係酒吧拎嘅係小食牌，好多嘢都要喺食物工場準備好，先至拎過嚟，好彩搵到朋友做食物加工場。另外，目前只能夠做中午，四點鐘就要交場畀番酒吧。不過解決問題嘅過程係一次好好嘅經驗，相信對將來會有用。」Kenneth說。
Bar Pacific
北角渣華道196-202號嘉富大廈地下（北角分店）
葵芳榮芳路77-85號葵樂大廈地下（葵芳分店）
撰文：陳佳男
攝影：蔡政峰@Fixer Production
編輯：陳慧玲