浙商總會噚日宣佈喺香港成立分會，並舉行成立儀式，總會會長、阿里巴巴主席馬雲當然在席，特首林鄭月娥亦獲邀出席，兩人更加有對談環節，林鄭趁機向馬雲招手，佢話呢個活動多次更改時間，但改咗兩次佢都有嚟，除咗因為浙江人嘅同鄉情誼，亦都因為馬雲，林鄭話隨住港交所即將允許「同股不同權」掛牌，「希望馬雲的阿里巴巴能來香港上市」，仲話想香港可以培養好似馬雲咁嘅企業家㖭！
林鄭盼阿里來港上市
大會安排兩人對談半小時，但馬雲同林鄭各自只係發言咗3次。林鄭發言時主動提到希望阿里巴巴來港上市，強調自己「不是白說的」，指要迎接新經濟，唔可以冇咗創新意念。馬雲亦回應話，上次阿里巴巴在港上市嘅機會擦身而過，今次會好好把握，佢又稱讚林鄭做事有企業家精神，「有時做對的事都會遭到反對聲音」，指喺林鄭帶領下嘅港府執行能力強，而由於現屆特區政府支持率高，馬雲對香港未來充滿信心，又讚香港年輕人優秀，名副其實同林鄭嚟個真‧connect。馬雲仲話，香港係浙商走出去嘅第一大目的地，所以阿里巴巴當初選擇在港上市，而阿里目前在港有300名員工，但未計《南華早報》員工，佢又透露喺香港有好多「第一次」，指阿里巴巴嘅註冊總部同第一個新聞發佈會都喺香港、第一批管理層亦係香港人，連自己第一個出外嘅地點都係香港。
身為全國政協副主席嘅前特首董建華亦獲邀為典禮致辭，佢話自己都係浙江人，認為香港選咗兩位浙江人做特首，認真難得，相信林鄭月娥會係歷任特首之中最好嘅一個，台下人士隨即拍手叫好，唔知講到暫時歷任最差，又係邊一位？
李八方