賓架A要請一位CTO（首席科技官）在佢嘅部門工作，嘆請人好難，唔易搵。以前打銀行工貪職位穩陣，人工不錯，但現在銀行一如其他機構，一有事就炒人，重組唔使眨眼，薪水加花紅又未必夠科技股公司吸引，科技人才點解要加入銀行呀？賓架A話：「我見過幾個內地年輕專才，佢地一心想加入騰訊之類嘅公司，唔想入銀行，又見過兩三個柏克萊、史丹福科技碩士，佢地話正想開設初創公司，如果唔掂先至肯考慮我嘅Offer，我唯有放棄佢地啦。」佢話讀科技（STEM）嘅碩士，有十年八年工作經驗嘅話，入銀行部門做「首席科技官」興趣不大，佢曾出席一個大型金融研討會，小組討論時，觀眾向四位財經專家高官詢問一條假設性問題：「你位千金自大學畢業，有三個機構向佢下聘書，分別係（一）銀行，（二）監管機構，（三）初創公司，你會贊成女兒揀邊份工？」答案令人驚奇：四位仁兄仁姐都答：「初創企業。」
加入初創企業有風險，分分鐘糧都出唔到，但美國成功例子太吸引，香港亦見到股王騰訊、獨角獸、大疆等成功故事，豈止內地STEM學生着迷，本港STEM學生及美國回流青年亦想加入騰訊，唔想做政府工或銀行工，趁青春，投資三至五年（或者係投注）於初創企業，博吓先啦。
左丁山問賓架A：「你要請CTO搞數碼金融科技，係為咗賣產品？」大賓架話：「你錯嘞，我地搞財富管理，對象係富翁級至富豪級客戶，佢地最注重面對面講投資，聽清楚我地畀意見，唔會用手機買賣咁簡單嘅。要行多一步：富翁富豪級顧客嘅公司可能正受到一啲顛覆性科技公司挑戰，例如Uber顛覆的士業，要想辦法應付，維持生意額，如果我地有科技專家向佢地提供意見，個客點會容易走？」諗得咁深遠，下棋諗埋之後嘅五步，真係服晒佢，唔怪得佢咁成功。於是順口問：「咁樣你啲RM要唔要識電腦，FinTech呀？」佢答：「正是，以後會考慮多聘請STEM畢業生嚟訓練，BBA競爭力開始差些少。」今年DSE考生或IB考生想入讀大學商學院，聽住咯喎，如果係中學理科尖子，今年入唔到醫科，唔好讀環球商業嘞，最好入工學院讀IT，副修商科/財務，甚至科技/商科雙主修，純讀商科就會落後於大趨勢！