打工仔返新工，通常有三個月試用期，上市公司行政總裁（CEO）可能都唔例外。松景科技（1079）噚日就話，舊年11月中加盟做CEO嘅李劍，因未能融入公司企業文化，公司於是同李劍終止服務協議。數數手指，李劍做咗兩個月都冇。
松景科技呢隻股，舊年中正式易手，由綠領（061，前稱北亞資源）主席張三貨以3.5億元入主，一開始張三貨做晒主席兼CEO，11月中就話，為提升公司企業管治同遵守聯交所上市規則（主席與CEO分開二人擔任），因而委任34歲嘅李劍做CEO。
根據資料，李劍於哈爾濱廣播電視大學讀經濟系，2010年起喺哈爾濱和宸投資管理出任高層，舊年做過上海兀陶教育科技CEO。佢做松景科技CEO，月薪8萬大元㗎，點知家陣因為融入唔到公司文化，8萬月薪飛走咗。
佢唔做咁邊個做呢？咪就係主席張三貨做埋囉，身兼兩職，人工當然有得加，月薪10萬元。張三貨有長江商學院工商管理碩士學位，通告指佢有逾廿年企管經驗，包括礦業、投資、金融等。嗱，佢投資應該真係有經驗嘞，佢每股0.65元入主松景後，隻股舊年11月見過2蚊，今日都收1.41元㗎。