特首林鄭月娥上月中上京述職後，向傳媒透露已就粵港澳大灣區發展，向中央政府爭取做到人流、物流、資金流同信息流全面流通，話晒大灣區都係阿爺嘅新baby，特區政府當然要積極推動，食衞局長陳肇始噚日率團上惠州，出席今日舉行嘅首屆粵港澳大灣區衞生與健康合作大會，傍晚返港，離港期間由副局長徐德義署任局長。
呢次大會主題係「構建粵港澳大灣區健康共同體」，陳肇始會喺開幕儀式上致辭，並會簽署粵港澳三地就大灣區衞生及健康嘅合作框架協議，隨後出席會議。衞生署署長陳漢儀、醫管局主席梁智仁同醫管局行政總裁梁栢賢都隨行赴會。
點解咁大陣仗？事關港澳辦上月尾喺網頁公佈，澳門特首崔世安都提出希望中央支援港澳喺大灣區開醫院、健康養老中心，試問娥班子點可輕視呢個共同體？