人稱盃王之練馬師大摩，開倉逾30年以來威水史一大籮，數之不盡，例如係現今在港累積獎金最多、贏得頭馬最多之廐主，贏大賽更屬家常便飯，是香港馬壇殿堂級人物。
不過今季大摩暫時失去風采，至今只勝出11場頭馬，在練馬師榜排15位處中下游，有項數據更是差到難以置信，原來他今季在快活谷未嘗一勝，亦為目前23廐當中，唯一季內快活谷頭馬交白卷之馬房，谷草成績排名包尾，堂堂大倉認真失威。
大摩季內谷中最叻只憑「美麗寶寶」和「美麗鉅星」跑過兩次亞軍，但踏入新一年，大摩似乎想一洗谷戰頹氣，本周三（10日）2018年首次谷中夜馬，大摩六駒列陣質量兼備，絕對有睇頭。
當晚1800米三級賽一月盃，大摩報兩駒「鷹雄」與「活力歡騰」，其中「活力歡騰」力求衛冕，而「鷹雄」係上季皇太后紀念盃盟主，計級數力足一爭。
至於角逐四班1200米的「大四喜」，上季曾與勁旅「旺蝦王」串Ｑ，上仗田草1200米排劣檔亦只輸不足兩馬位，減至目前41分大大有利，今仗初跑谷草對手實力大不如前，看來大摩有望在谷草取得零的突破。
周三谷戰摩廐正選馬
1800米三級賽一月盃：鷹雄、活力歡騰
二班1200米：海翡翠
三班1650米：美麗寶寶
四班1200米第一組：大四喜
四班1200米第二組：銀城福星