一月三日，校友會午餐例會之期，按例邀請不同校友投資專家講述新一年，即2018年之投資前景，到場校友多達60人，比平時高出近倍。
首先係一位銀行董事總經理財資T講外匯，佢話美國宣佈稅改，大幅度減稅後，美元疲弱，主要原因係市場恐怕美國財政赤字會因減稅而不斷擴大，對美元不利，故拋售美元，但美元匯價指數若跌破90，已可吼位買入，估計跌到85就會引彈，故此不宜睇得太淡，因為其他貨幣亦冇乜好消息或數據支持強勢，澳洲元稍為好啲，全球經濟復甦嘅話，對礦產及原材料需求必然增加，對澳洲經濟有利。油價連續兩年反彈，期油每桶升至60美元，已經足夠吸引美國頁岩油大量增加生產，抑製石油價格上升幅度，而且特朗普已宣佈批准油公司鑽探東西兩岸海洋搵油田，油價就快見頂。黃金在2018年看好，上升至每安士1430美元左右。本港股市會上升，見三萬三千點或港交所升至每股三百元就差不多嘞。
私人銀行董事、亞洲投資策略師H，就話為咗避險，多買股票之餘，更要買番一啲新興市場債券作分散投資用。今年環球通脹率唔會高，過去一個月不見有資金回流美國，仍留在新興市場。預料2018年投資回報率會低過2017，仍然係以亞洲股市最有睇頭，美股繼續上升，但幅度減慢，比較之下，亞洲股票較為便宜，去年落後跑輸大市之馬來西亞、印尼、新加坡股票可多加留意。
基金公司老闆P指出2018年兩大趨勢係金融科技FinTech與生物科技BioTech，呢兩個板塊之新上市股票必須留意，會係增值最快最勁嘅股票種類，港交所歡迎同股不同權公司，可吸引巨型獨角獸來港上市，可以跟風，環球大勢所趨也。過去兩年巨無霸科技股不斷利用高股價優勢去收購舊經濟公司，如阿里巴巴收購高鑫，阿馬遜收購Whole Foods，形成科技股吃掉實體店零售商，增加市場壟斷性局面，故此大科技股唔買唔得。冷門股市要吼實俄羅斯，普京必然當選連任總統，為求向支持者交代，會有手段刺激經濟，趁油價回升企穩，推高俄羅斯股市，資產管理總經理M就講股，指出北水會追逐新概念股板塊，龍頭大股如騰訊、平保、吉利、港交所、四五間大銀行等，呢類股份買咗就收埋唔使理，博收息及慢慢升。搏命型就買新IPO科技股，小注怡情博倍升。左丁山講大趨勢，叫校友子弟今年選大學學科要讀電腦、生物科技，BBA已過氣，要學好中文，兼認識AI如何取代你！