記唔記得《喜劇之王》嗰位龍少？試想像龍少係廣州恒大老闆許家印，而多蒙特前鋒奧巴美揚係張柏芝，重演「錢，我大把。攞去啦，滿意未呀？」
以上情境絕對唔係FF㗎！皆因強國傳媒話，多蒙特已經同中超土豪球隊恒大達成協議，奧巴美揚踢埋今季德甲就會過擋。咁啱而恒大後衛馮瀟霆上強國電視節目嘅時候話：「我們許老闆就不一樣了，不僅不欠薪，還總發獎金，煩死了！」所以許家印畀好多錢買奧巴美揚堅有可能會發生！
額外加多一個point。16年12月尾，泰維斯過檔上海申花，據報周薪係天價61.5萬鎊（約650萬港元）。家陣呢位33歲嘅佢搵夠，返咗去阿根廷勁旅小保加，掘金王呢個位置懸空咗。奧巴美揚後生5年，28歲，做過德甲神射手，對上三季亦係多蒙特頭號射手，又咁識搞gimmick。去到中超搵得多過泰維斯，一啲都唔出奇囉！