非一般嘅Party，大家開過未？慈雲山嘅聖文德天主教小學最近邀請咗逾20名視障人士一齊開P，實踐傷健共融。為咗準備呢次活動，十幾名小四生喺導師帶領下學習「領路法」，一人戴住眼罩扮失明人士，另一人就扮領路員，由五旬節聖潔會靈光白普理失明人士中心出發行返小學，7分鐘嘅短路程，每一步都考驗緊佢哋嘅勇氣。好似扮失明人士嘅謝家寶就話，蒙眼走路好緊張，一唔小心就會撞到柱，上落樓梯都驚絆倒。
花兩個月讀電視節目旁述
除咗領路法，學生仲要學埋口述影像技巧同製作點字抽獎券，因為派對上其中一個環節就係畀來賓「聽」電視，陳立仁就同同學仔花咗兩個月時間，為一套廿分鐘長嘅電視節目撰寫旁述，佢話最難嘅係時間控制，要趁冇對白嘅空檔作旁述，時間一到就要停，以免同角色嘅對白重叠。
苦苦學習有大大收穫，唔少參加派對嘅失明人士都大讚學生very good，好感動佢哋嘅真誠付出。學校校長張偉菁就話，教育唔係紙上談兵，活動係想鼓勵學生關心弱勢社群，未來會繼續舉辦類似活動。