英皇書院係港島區傳統名校，位於西環般咸道嘅紅磚校舍，1926年已經啟用，仲係法定古蹟，學校方面順理成章咁將呢一年定做創校年，點知連創校年都有得拗？
前身或是官立西角義學
梁植穎喺英皇書院教咗31年書，退休之後熱心研究英皇書院歷史，經常翻查舊檔案。佢將研究所得結集成書，用4年時間出版咗本圖片集。噚日梁老師嘅新書發佈會，陣容鼎盛，仲請到財經事務及庫務局前局長陳家強同衞生署副署長黎潔廉等幾位知名校友撐場。
發佈會上梁老師話發現係一次機緣巧合，咁啱喺舊檔案入面搵到蛛絲馬迹，發現1857年創立嘅官立西角義學，可能係英皇書院嘅前身，經歷幾次改校名、搬校址，最後成為𠵱家嘅英皇。計吓條數，即係英皇書院有成160年歷史喎！
本書仲話全港10大歷史最悠久中學排行榜嘅頭10位，有唔少都將前身學校嘅創立年份定做創校年。如果英皇都用將創校年改做1857年，就會登上第3位，超越創校155年嘅皇仁書院，成為官中嘅第一名！