上個禮拜六嘅英足盃第三圈，曼城主場喺落後一球嘅情況下反吸，最終以4:1擊敗般尼晉級，而贏波功臣就梗係喺下半場火速轟入兩粒嘅阿古路。領隊哥迪奧拿亦大讚阿古路表現神勇，仲話有機會教到對方係一種榮幸。
作客嘅曼城上半場25分鐘有中堅史東斯高波解圍撻Q，造就般尼嘅艾殊利班尼斯單刀入波，半場落後0:1。好彩下半場早段阿古路大爆發火速攻入兩粒反超，之後再有利萊辛尼同貝拿度施華入波，曼城先至能夠晉級。賽後哥帥話：「首先，能夠有阿古路喺我麾下係一種榮幸。呢次又再證明，佢對曼城嚟講真係好重要。」
另外《每日鏡報》話，曼城會再買入兩個球員，分別係阿仙奴嘅山齊士同埋皇家蘇斯達嘅恩尼高馬天尼斯。由於山齊士將會喺季尾就約滿，曼城只係會出2,500萬鎊嘅低價。至於恩尼高馬天尼斯，曼城就打算激活佢價值2,800萬鎊嘅解約條款，直接搶人！
