今年首場花生滿地嘅選舉，首推1月18日嘅大律師公會改選，現屆主席林定國爭取冧莊，卻因被認定喺一地兩檢等爭議問題上未有積極發聲，惹來業界元老、由資深大律師戴啟思領軍嘅團隊挑戰，而戴啟思名單上最吸睛嘅名字，當然係資深大狀、公會前副主席駱應淦，法律界唔少人都對於佢肯上陣好意外，而罕有接受傳媒訪問嘅駱應淦為選戰都不停闡述參選理念，噚日評論徒弟袁國強及特首林鄭月娥更字字千金。
為抗一地兩檢參選
剛辭任律政司司長嘅袁國強係駱應淦嘅徒弟，駱應淦喺港台訪問中難免被問及對徒弟任內表現，佢直指縱使袁國強任內有啲事「受萬夫所指、眾人責難」，但佢都會挺身而出，相信建制中人會欣賞袁嘅任內表現；但如果好似佢自己呢類法律界呢，睇起上嚟就會失望，覺得袁冇堅持維護法治原則囉！有「讚」有「彈」，係咪好公道先？
而推動駱應淦今次站出來嘅議題，當然都同一地兩檢安排有關，佢話呢個係特區回歸20年來對法治最嚴重嘅衝擊，因為完全冇一個合理嘅法治基礎、冇一條《基本法》條文合適，既然係咁就應該修改《基本法》或用其他方法，覺得政府應該收回方案同暫緩立法。
提到一地兩檢，自不可少特首林鄭月娥嘅「金句」，皆因娥特話過喎，部份法律界人士有「精英心態」，駱應淦回應呢件事，就以「不幸」形容林鄭嘅用字，話講得唔好聽就係「發爛渣」，覺得林鄭可以講得高雅啲，唔知娥特唔會唔接納駱應淦呢番「精英之見」？
李八方