BBC之一嘅威爾斯翼鋒加里夫巴利，近年因為成日受傷，喺皇家馬德里地位大不如前，據聞管理層亦對佢失去耐性，唔介意收到好價錢，就將佢送走。之前一路都傳話曼聯想買巴利，但近期英國媒體嗰邊就吹到話中超球會廣州恒大都對巴利有興趣，尤其係荷西保連奴離開咗之後，佢哋好需要一位夠份量嘅歐洲一級球星可以撐起隊波，所以肯出到8,500萬鎊（約9億港元）轉會費，希望可以羅致到巴利。其實唔單止加里夫巴利，多蒙特嘅奧巴美揚最近都同恒大扯上關係，中國傳媒仲話，多蒙特已經同恒大達成協議，踢埋今季德甲就會過檔。恆大老闆許家印到底係咪有咁多錢可以買到呢啲一級球星呀，都係食住花生先喇！