工聯會噚日慶祝70周年會慶，出名用午餐肉反拉布嘅王國興同棠哥鄭耀棠竟然冇蒲頭，唔知係咪因此令班會員「作反」，喺台下公然「拉布」？
話說工聯會向與會者派發「打氣巾」，背面係白色，正面就寫上「同心，創新」嘅工聯會70周年會慶主題，叫大家齊齊展示，而台上主持可能都驚現場攝記影到一片「拉布」人潮，所以大合照時，特別提醒在場人士要正面展示，避免全場拉晒白布。
小肥張祝永遠壯大
而出任政務司長前、曾任勞福局局長多年嘅張建宗，噚日出席活動時狂向工聯會笠高帽，話工聯會70年發展中，有22年同佢係好朋友，所以特別到場為工聯會賀壽。
小肥張又話，工聯會呢位「老人家」係好值得尊敬嘅長者，「呢個老人家永遠都喺度壯大、茁壯成長，不斷快高長大」，話工聯會1948年成立時，只有2萬會員，今日就有成41萬，係香港一個重要人口組成部份，話如果計埋工聯會會員嘅家人，差唔多每10個港人就有一個工聯會成員、或者係同工聯會有關係嘅朋友，所以工聯會影響力好大喎。