魚腩賓尼雲圖（圖）終於轉運，喺上周六嘅意甲反勝打少個嘅森多利亞3:2，繼上輪聯賽贏基爾禾後，今場又拎三分，錄得聯賽兩連勝！主場出擊嘅賓尼雲圖半場先落後一球，打到69分鐘，賓軍前鋒馬森姆高達繼上輪後又有波入，幫主隊追平1:1。森多右閘積高普沙拉喺83分鐘被罰出場之後，球隊極速崩盤，俾主隊嘅馬森姆高達同比路拿再入兩球，就算臨完場追番一球都要輸2:3。同日拉素作客史帕爾，恩莫比尼半場就入三球，造就拉素上半場領先4:2，終以5:2大勝。至於AC米蘭就憑隊長邦路斯頭槌入波，主場以1:0小勝克羅托內。另外，拖連奴炒教練後鹹魚翻生，同日憑迪施維斯查、麥巴耶尼安同耶高法爾基各入一球，以3:0大炒博洛尼亞。