民協舊年喺立法會選舉遭「清倉」後，18位區議員中，6人先後退黨，導致民協喺九龍城、油尖旺區議會一席不保，唔少前民協成員更加轉投白鴿黨，包括九龍城區議員蕭亮聲同黎廣偉，以及前主席莫嘉嫻。而民協馮檢基同白鴿黨袁海文喺九西民主派初選「打仗」期間，再有女將過檔，據知深水埗區議員鄒穎恒（Zoe）前日正式轉投白鴿黨，令到上屆區選後原本只有袁海文同涂謹申兩名區議員嘅白鴿黨九西支部，現時區議員激增至5人，民協前成員仲多過白鴿黨原本嘅區議員數目。
袁海文話過去一直同Zoe合作無間，直認一直有邀請Zoe加入白鴿黨，現時Zoe更加係佢初選團隊核心成員之一。基哥就話民協雖然有啲區議員走咗，但唔少人之前都有喺初選幫佢手，包括前民協區議員林健民、吳美、楊振宇等，縱然Zoe離開民協，但仍然係民主派陣營，大家仍然係同路人喎。